Sjávarútvegsráðherra hefur lofað Mannréttindanefnd Sþ. því að kvótakerfið verði endurskoðað. Nefndin segir, að mannréttindi séu brotin á Íslandi með framkvæmd kerfisins.Ekkert er þó farið að gera enn varðandi endurskoðun kerfinsins.Óánægja með kerfið eykst nú. Sjómaður,Ásmundur Jóhannsson frá Sandgerði, réri kvótalaus til þess að mótmæla ranglæti kerfisins. Hann verður sjálfsagt ákærður. Hann segir,að það sé í góðu lagi. Hann muni kæra niðurstöðu dómsins hér til Mannréttindadómstóls Evrópu. Búist er við að margir muni á næstunni fylgja fordæmi sjómannasins frá Sandgerði og róa kvótalausir til þess að mótmæla ranglátu kerfi. Er búist við að hreyfing muni myndast og landsmenn rísa upp gegn hinu rangláta kerfi. Ég fagna því ,ef svo verður. Kvótakerfið er ranglátt. Það var sett á með ranglátum hætti og framkvæmt á ósanngjarnan hátt samkvæmt úrskurði Mannréttindanefndar Sþ.
Mesta ranglæti Íslandssögunnar
Kvótakerfið og framkvæmd þess er mesta ranglæti Íslandssögunnar. Það er verið að úthluta tiltöklulega fáum útvöldum fríum gæðum,sem þeir hafa síðan geta braskað með og selt fyrir milljarða króna. Margir hafa gengið út úr greininni með fullar hendur fjár enda þótt þeir hafi fengið gæðin frí.Þetta eru mannréttindabrot.Það eiga allir þegnar að sitja við sama borð og það jafnrétti er stjórnarskrárvarið.Ég tel,að með því að mismuna þegnunum eins og gert er í kvótakerfinu sé verið að brjóta stjórnarskrána.
Kvótamálinu ítt út af borðinu í kosningunum
Í þingkosningunum 2003 lagði Samfylkingin höfuðáherslu á kvótakerfið og nauðsynlegar breytingar á því. Flokkurinn setti þá fram tillögur um svonefnda fyrningarleið til þess að afnema kerfið smátt og smátt. Æ fleiri hafa séð,að það er skynsamleg leið. Samfylkingin náði ágætum árangri í kosningunum 2003 en þó var sagt,að gagnrýnin á kvótakerfið hafi ekki fengið nægilegan hljómgrunn. Ég er ekki sammmála því. Í kosningunum 2007 minntist Samfylkingin varla á kvótakerfið.Hvað hafði gerst? Jú flokkurinn ítti málinu út af borðinu til þess að greiða fyrir ríkisstjórn með íhaldinu.Þetta var forkastanlegt. Það var búið að boða félagshyggjustjórn en síðan fengu landsmenn ríkisstjórn með íhaldinu áfram. Breytingin var aðeins sú,að Samfylkingin kom inn í stað Framsóknar.Þetta voru mikil vonbrigði. En það hefði mátt réttlæta það ,ef Samfylkingin fengi einhver mikilvæg stefnumál framkvæmd. Það hefur ekki orðið enn en vonandi verður svo. Það var hvergi samþykkt í Samfylkingunni að íta kvótamálinu út af borðinu. Ákvörðun um það virðist hafa verið tekin af forustu flokksins.Ég er mjög óánægður með það og mótmæli því hér með sem félagsmaður í Samfylkingunni og frambjóðandi í síðustu kosningum.
Ég vænti þess samt,að Samfylkingin sjái til þess að gerðar verði róttækar breytingar á kvótakerfinu í samræmi við óskir Mannréttindanefndar Sþ. Það verður að breyta kerfinu þannig,að hætt verði að brjóta mannréttindi.Það er lágmarks breyting.
Björgvin Guðmundsson
Birt í Fréttablaðinu 11.sept. 2008 | 
