Það,sem einkenndi ræðu Geirs H.Haarde á landsfundi íhaldsins var ,  að Geir var mestalla ræðuna  að afsaka  hagstjórnarmistökin. Hann var að svara hinu merka plaggi Jóns Sigurðssonar og Samfylkingarinnar um mistök ríkisstjórnarinnar í hagstjórninni.Hans aðalsvar í því efni var að segja, að kaupmáttur hefði aukist um 60 % síðustu 12  árin. Sjálfstæðisflokkurinn og ríkisstjórnin hefur klifað á því, að  kaupmáttur hafi aukist mikið sl. 12 ár en þeir sleppa  að geta þess, að  kaupmáttur aldraðra hefur á sama tíma aðeins aukist um 20%. Ríkisstjórnin  “gleymdi” sem sagt öldruðum og reyndar öryrkjum einnig  en öryrkjar þurftu að sækja sínar kjarabætur með málarekstri gegn ríkisstjórninni í tvígang. Á áratugnum 1971- 1980 jókst kaupmáttur um 5,7% til jafnaðar á ári eða  mun meira en sl. 12 ár. Á þessu tímabili voru við völd ríkisstjórnir Ólafs Jóhannessonar, Benedikts Gröndal og Geirs Hallgrímssonar. Á viðreisnaráratugnum jókst kaupmáttur um til jafnaðar um 5,2% á  ári, þ.e. meira en síðustu 12 árin. Það tekur því þess vegna ekki fyrir Sjálfstæðisflokkinn að guma af 5% kaupmáttaraukningu á ári  á einhverjum mesta góðæristíma landsins.Flokkurinn ætti frekar að líta í eigin barm og athuga hvers vegna aukning kaupmáttar gekk ekki jafnt yfir til allra í þjóðfélaginu.

Engar skerðingar í Svíþjóð

 Geir H. Haarde spilaði því út, að hann vildi  draga úr skerðingum á tryggingabótum almannatrygginga  og  fella niður skerðingar vegna atvinnutekna hjá þeim,sem væru oðnir sjötugir og vildu vinna. Þetta er gott svo langt sem það nær og tímabært eftir 16 ára valdasetu að Sjálfstæðisflokkurinn    sjái, að það þurfi að bæta kjör aldraðra. En þetta er of lítið og of seint.Sjálfstæðisflokkurinn talar mikið um það hvað Íslendingar hafi það gott og hvað kjör  þjóðarinnar hafi batnað mikið undanfarin ár. Það er oft sagt,að Ísland sé með ríkustu þjóðum heims. En hvers vegna geta  Íslendingar þá ekki boðið öldruðum jafngóð kjör og aðrar ríkar þjóðir gera  eins og t.d. Svíar. Í Svíþjóð eru engar skerðinga á  tryggingabótum aldraðra. Við eigum að fara  eins að og afnema allar skerðingar en ekki aðeins að draga úr þeim. Hvorki atvinnutekjur né tekjur úr lífeyrissjóði eiga að skerða lífeyri  frá almannatryggingum og þetta á að gilda frá 67 ára aldri en ekki frá 70 ára aldri eins og  íhaldið leggur til.Skerðingar vegna tekna maka á að afnema með öllu strax enda eru þær brot á stjórnarskránni.

 Geir H.Haarde gat ekkert um það í ræðu sinni hvað hann vildi hækka lífeyri aldraðra í heild mikið.Þessi lífeyrir er í dag 126 þúsund krónur á mánuði fyrir skatta hjá einstaklingum sem mest fá frá almannatryggingum og ekki eru í lífeyrissjóði.Eftir skatta gera þetta 113 þúsund á mánuði.Hver lifir sómasamlega af þeirri upphæð í dag?  Félag eldri borgara í Reykjavík vill hækka lífeyrinn í 210 þúsund á mánuði hjá einstaklingum, þ.e. til samræmis við neysluútgjöld einstaklinga samkvæmt neyslukönnun Hagstofunnar. Þetta er lágmarkshækkun en ekkert kom fram hjá Geir um slíka hækkun lífeyris  aldraðra.

Björgvin Guðmundsson