Jónas Jónsson frá Hriflu var aðalstofnandi Framsóknarflokksins,en einnig var hann viðriðinn stofnun Alþýðuflokksins. Ætlun Jónasar var sú, að þessi flokkar mundu vinna saman;vinnandi fólk til sjávar og sveita.Það hefur verið allur gangur á því hvernig það hefur tekist. Í Alþýðuflokknum var nokkur hópur manna sem var óánægður með Framsóknarflokkinn,taldi hann hentistefnuflokk,sem hugsaði um það eitt að gæta hagsmuna SÍS. Ég var ekki í hópi þessara manna. Ég taldi Framsóknarflokkinn berjast fyrir svipuðum hugsjónum og Alþýðuflokkurinn gerði,þ.e. fyrir samvinnustefnuna, sem væri í raun grein á meiði jafnaðarstefnunnar. Ég átti mjög gott samstarf við fulltrúa Framsóknar í borgarstjórn Reykjavíkur, einkum þá Kristján Benediktsson,Alfreð Þorsteinsson og Guðmund G.Þórarinsson.
Með tilliti til þess, sem að framan segir urðu það mér mikil vonbrigði þegar Framsóknarflokkurinn hafði forustu um það að hrekja Ingibjörgu Sólrúnu úr embætti borgarstjóra fyrir þær sakir einar að hún vildi bjóða sig fram í varamannssæti til Alþingis. Ég tel víst, að forusta Framsóknarflokksins hafi hér ráðið málum og gefið borgarfulltrúum sínum fyrirmæli um að hrekja Ingibjörgu Sólrúnu úr embætti borgarstjóra. Er hætt við því að þessi atlaga að Ingibjörgu Sólrúnu verði til þess að R-listinn tapi meirihluta sínum í Reykjavík. Skoðanakönnun um fylgi flokkanna í Reykjavík eftir að Ingibjörg var hrakin úr embætti leiddi í ljós, að R-listinn var fallinn. Skynsamlegra hefði því verið fyrir Framsókn og VG að samþykkja tilboð Ingibjargar Sólrúnar um að hún sæti sem borgarstjóri út kjörtímabilið þó hún yrði jafnframt varaþingmaður.
Framsóknarflokkurinn hefur mjög fjarlægst upphaflega stefnu sína,þ.e. samvinnustefnuna. Í dag er aðalbaráttumál Framsóknar að koma á einkarekstri og einkavæðingu eins og Sjálfstæðisflokkurinn berst fyrir. Framsókn minnist ekki lengur á samvinnurekstur.Svo virðist sem Framsókn hafi gleymt upphaflegum baráttumálum sínum,þ.e. að berjast fyrir félagshyggju og samvinnustefnu. Framsókn er í dag ekki meiri félagshyggjuflokkur en Sjálfstæðisflokkurinn Framsókn er á villigötum í dag. Vonandi finnur flokkurinn réttu leiðina á ný.
Björgvin Guðmundsson,fyrrverandi borgarfulltrúi
Birti í Mbl. 2003 |
