Félag eldri borgara í Reykjavík hélt stjórnmálafund 28.apríl  með  efstu mönnum allra framboðslistanna við borgarstjórnarkosningarnar í Reykjavík. Guðrún Ásmundsdóttir,leikkona,var fulltrúi Frjálslyndra á fundinum.Fulltrúar flokkanna héldu framsöguræður en síðan svöruðu þeir fyrirspurnum fundarmanna.Rætt var vítt og breitt um málefni eldri borgara en fulltrúar flokkanna komu einnig inn á mörg önnur borgarmál og málefni eldri borgara,sem heyra undir ríkisstjórnina

Auðveldum eldri borgurum að vera í eigin íbúðum

 Björgvin Guðmundsson, fyrrverandi  borgarfulltrúi, beindi  þeirri fyrirspurn til fulltrúa flokkanna hvort til greina kæmi að fella niður fasteignagjöld þeirra ellilífeyrisþega,sem orðnir væru 70 ára og eldri, þ.e. af einni íbúð hjá hverjum. Guðrún Ásmundsdóttir,fulltrúi Frjálslynda flokksins, sagði þetta góða hugmynd og kvaðst vilja samþykkja hana.Það ætti að auðvelda eldri borgurum að vera í sínum eigin íbúðum sem lengst og einnig í stórum íbúðum, þar eð  margir eldri borgarar vildu taka á móti sem flestum gestum. Fulltrúar hinna flokkanna voru ekki eins jákvæðir  gagnvart hugmyndinni um niðurfellingu fasteignagjalda eldri borgara  eins og Guðrún en allir ræddu þeir þó nauðsyn á  lækkun fasteignagjalda ellilífeyrisþega.

Fasteignagjöldin eru of há

 Ljóst er,að há fasteignagjöld torvelda ellílífeyrisþegum að halda íbúðum sínum.Nú hefur eignarskattur ríkisins verið felldur niður. Í framkvæmd virkaði hann oft eins og íbúðarskattur,þar oft var íbúðin eina eignin.En eftir stendur hár fasteignaskattur.Það þarf að fella þann skatt niður af ellilífeyrisþegum.Veitum öldruðum áhyggjulaust ævikvöld.

  Björgvin Guðmundsson