Hvers vegna myndaði borgarfulltrúi Framsóknar ekki meirihluta með andstöðuflokkum Sjálfstæðisflokksins í borgarstjórn? Voru það fyrirmæli ofan frá,að Framsókn ætti að vinna með íhaldinu?

 Þegar R-listasamstarfið rofnaði, sögðu margir fulltrúar R-listans, að  R-listaflokkarnir gætu unnið saman og myndað meirihluta enda þótt R-listinn byði ekki fram saman.Hvers vegna var ekki látið reyna á það til fulls? Var kippt í spotta af forustumönnum stjórnarflokkanna? Líklegt er, að svo hafi verið. Það tók aðeins 1 klukkutíma fyrir íhald og framsókn að mynda meirihluta og engu líkara en það hafi áður verið búið að ákveða slíkan meirihluta fyrirfram.

Vilji er allt sem þarf

Gunnar Thoroddsen sagði einhvern tímann,þegar hann ræddi stjórnmál: Vilji er allt sem þarf.(Hann var hér að vitna í Einar Benediktsson skáld). Og þetta eru orð að sönnu. Þegar vinstri flokkarnir mynduðu meirihluta í borgarstjórn 1978 vissu þeir allir hvað þeir vildu.Þeir vildu mynda nýjan meirihluta og koma íhaldinu frá völdum.Allir flokkarnir voru samstíga. Framsókn var jafn áfram um að koma íhaldinu frá völdum eins og hinum vinstri flokkunum. Það hvarflaði ekki að neinum  vinstri flokkanna að mynda stjórn  með íhaldinu.Það er sama hvað íhaldið  hefði boðið. Því hefði verið vísað á bug. Það hjálpaði mjög til,að vinstri flokkarnir höfðu þróað með sér samstarf áður en þeir náðu meirihlutanum. Þeir fluttu sameiginlegar breytingatillögur við afgreiðslu fjárhagsáætlana og komu fram sem einn flokkur. Þegar meirihlutinn var myndaður 1978 gekk ekki hnífurinn á milli vinstri flokkanna. Hvers vegna var framsókn gerbreytt 2006 frá því sem verið hafði 1978? Var það stjórnarsamvinnan með íhaldinu,sem hafði breytt framsókn? Er hér ef til vill að finna skýringuna á fylgistapi framsóknar? Hefur framsókn yfirgefið stefnu sína og tekið upp íhaldsstefnu í staðinn? Það er sennilegasta skýringin á lánleysi framsóknar. Það er ekki nóg að komast í meirihluta í einhverjum sveitarstjórnum, ef fylgið hverfur frá framsókn og fólkið treystir ekki flokknum.

 Björgvin Guðmundsson