Samstarf stjórnarandstöðuflokkanna í baráttunni gegn fjölmiðlafrumvarpi ríkisstjórnarinnar var til mikillar fyrirmyndar.Segja má,að stjórnarandstaðan hafi algerlega staðið saman meðan fjölmiðlafrumvarpið var til meðferðar á alþingi.Um algera samstöðu var að ræða hvort sem um efni frumvarpsins var að ræða eða gagnrýni á málsmeðferð ríkisstjórnarinnar.

Offors einkenndi stefnu stjórnarinnar

 Eins og vel hefur komið fram stafaði hin  mikla andstaða við fjölmiðlafrumvarpið ekki aðeins af andstöðu við efni frumvarpsins  heldur  einnig af óánægju með það offors er einkenndi alla stefnu ríkisstjórnarinnar í máli þessu.Forsætisráðherra ákvað að flytja frumvarp,sem beindist gegn einu fyrirtæki,þ.e. Norðurljósum og svo virtist sem hann flytti frumvarpið vegna þess að honum væri í nöp við aðaleigendur Norðurljósa,þ.e. Baug.Þessi málatilbúnaður gekk fram af öllum flokkum stjórnarandstöðunnar.Þeir töldu,að ekki ætti að  setja lög á  eitt fyrirtæki. Og þeir voru þeirrar skoðunar,að stjórnmálamenn mættu ekki láta andstöðu sína við einstaka menn ráða gerðum sínum.Undrun vakti,að samstarfsflokkur Sjálfstæðisflokksins,Framsókn,skyldi taka undir öll sjónarmið forsætisráðherra í andstöðu hans við Norðurljós.

Stjórnarandstaðan samstíga-brestir í stjórnarsamstarfi

  Vonandi verður hin mikla og góða samstaða stjórnarandstöðuflokkanna til þess að treysta samstarf  þeirra  í framtíðinni  og auðvelda þeim að taka við völdum í landinu,þegar ríkisstjórnin hrökklast frá.Þess verður vart,að brestir eru komnir í stjórnarsamstarfið. Einn þingmanna Framsóknar,Kristinn H.Gunnarsson, treysti sér ekki til þess að styðja fjölmiðlafrumvarp ríkisstjórnarinnar.Hann greiddi atkvæði á móti því. Annar þingmaður Framsóknar,Jónína Bjartmars, treysti sér heldur ekki til þess að styðja frumvarpið. Hún sat hjá. Telja má víst,að einhverjir af hinum þingmönnum Framsóknar hafi einungis stutt frumvarpið  af greiðasemi við foringjann til þess  að hann missti ekki af forsætisráðherrastólnum. Nokkur ólga er nú í Sjálfstæðisflokknum vegna þess að flokkurinn ætlar að afhenda Framsókn stól forsætisráðherra 15.september n.k. Sjálfstæðismenn eru ekki hrifnir af því að Davíð Oddsson láti af starfi forsætisráðherra og víki fyrir Halldóri Ásgrímssyni. Hvort upp úr sýður er enn óvíst.En það kraumar undir.

Björgvin Guðmundsson

Birt í Fréttablaðinu  20.júní  2004

PS. Framangreind grein birtist í Fréttablaðinu 20.júní sl. En flest atriði hennar eru enn í fullu gildi. Enn er ólga innan stjórnarflokkanna. Nú er ólgan mest innan Framsóknar  og vill flokkurinn að fjölmiðlafrv. verði dregið til baka eða þjóðaratkvæðagreiðsla látin fara fram. Sjálfstæðisflokkurinn stendur gegn þessu-enn sem komið er.Þessi ágreiningur gæti valdið stjórnarslitum enda þótt telja verði ólíklegt,að Framsókn  fórni stól forsætisráðherra fyrir sannfæringu flokksins!

BG