Stórt skref var stigið í  átt til sameiningar vinstri manna, þegar Alþýðuflokkurinn og Alþýðubandalagiðð ákváðu að sameina flokkana. Það hafði lengi verið draumur jafnaðarmanna á Íslandi að sameina jafnaðarmenn í einn stóran jafnaðarmannaflokk. Því miður  náðist ekki fullkomin sameining. Hluti Alþýðubandalagsins fékkst ekki, þegar á reyndi til þess að taka þátt í þessari sögulegu sameiningu.Þeir stofnuðu nýjan flokk,Vintri hreyfinguna grænt framboð. Það var mikið ógæfuspor og seinkaði algerri  sameiningu jafnaðarmanna um mörg ár. Þess vegna er staðan eins og hún er nú eftir nýafstaðnar þingkosningar: Jafnaðarmenn klofnir í tvær fylkingar,Samfylkinguna og Vinstri græn. Samfylkingin er með 18 þingmenn og Vinstri græn með 9. Þettu eru alls 27 þingmenn. Það væri myndarlegur hópur hjá sameinuðum jafnaðarmannaflokki og  fleiri þingmenn  en íhaldið er með sem hefur nú 25 þingmenn.

Sagan endurtekur sig

Hvað á þessi klofningur íslenskra jafnaðarmanna að standa lengi? Hvað eiga deilur Samfylkingar og Vinstri grænna að endast? Samkomulag milli þessara flokka var þokkalegt í kosningabaráttunni en strax eftir kosningar byrjaði hnútukast milli þeirra á ný. Því miður minnir samband Samfylkingar og Vinstri grænna mjög mikið á  samskipti Alþýðuflokksins og Alþýðubandalagsins. Sagan er að endurtaka sig. Hvers vegna eru íslenskir jafnaðarmenn  öðru vísi innstilltir en jafnaðarmenn á hinum Norðurlöndunum, þar sem jafnaðarmenn hafa borið gæfu til þess að  sameina krafta sína  í stórum jafnaðarmannaflokkum?

Málefnaágreiningur er lítill

 Málefnaágreiningur er mjög lítill milli  Samfylkingar og Vinstri grænna.Heita má,að enginn ágreiningur sé í innanlandsmálum eftir að Samfylkingin markaði nýja stefnu í umhverfismálum,Fagra Ísland. Það er lítils háttar ágreiningur í landbúnaðarmálum en aðalágreiningur flokkanna er í utanríkismálum, þ.e. í afstöðunni til Evrópusambandsins. En í jafnaðarmannaflokkum úti í Evrópu er víða mikill ágreiningur um utanríkismál og  því gætu mismunandi sjónarmið í þeim málum rúmast innan sameinaðs stór jafnaðarmannaflokks hér.

 Ef mynduð hefði verið vinstri stórn nú, þ.e. stjórn Samfylkingar,Vinstri grænna og Framsóknar hefði það greitt fyrir auknu samstarfi vinstri flokkanna og stuðlað að sameiningu þeirra síðar meir. En samstarf  annars hvors vinstri flokkanna við Sjálfstæðisflokkinn torveldar að sama skapi samstarf og sameiningu þessara flokka. Það verða stanslausar deilur milli þessara vinstri flokka, ef annar þeirra fer í stjórn með Sjálfstæðisflokknum. Mér list ekki á það.

 Björgvin Guðmundsson

Birt í Mbl. 1.júní 2007