VANTAR 5 MILLJARÐA?

Afa fundur,sem haldinn var fyrir nokkrum dögum sagði,að ríkið  hefði tekið 5 milljarða til reksturs úr framkvæmdasjóði aldraðra!

Ég skrifaði grein í Morgunblaðið í febrúar á þessu ári og benti á að ríkisstjórnin hefði tekið til eyðslu 2,5 milljarða úr framkvæmdasjóði aldraðra,sem áttu að fara til framkvæmda. Þessi upphæð er sjálfsagt orðin mun hærri nú. Heilbrigðisráðherra tilkynnir nú, að 1,3 milljarðar eigi að fara til byggingar hjúkrunarheimila næstu 4 árin. Það á sem sagt að skila litlum hluta þess fjár ,sem ríkisstjórnin tók “ófrjálsri hendi” úr framkvæmdasjóði. Af hverju skilar ríkisstjórnin ekki allri fjárhæðinni? Morgunblaðið slær þessu upp á forsíðu með stríðletri. Það er í annað sinn sem Mbl. notar sömu fréttina á forsíðu.Athyglisvert er, að um sama leyti skrifa Ólafur Ólafsson  formaður LEB og Einar Árnason hagfræðingur blaðagrein um mikla kjaraskerðingu,sem eldri borgarar hafa orðið fyrir vegna skattpíningar. Í greininni er talað um blekkingar stjórnvalda.

 40 milljarða vantar

Ég hefi bent á, að frá 1995 hafa stjórnarflokkarnir haft 40 milljarða af öldruðum vegna skertra lífeyrisgreiðslna. Þeir hefðu fengið 40 milljörðum meira í lífeyrisgreiðslur en þeir hafa fengið, ef staðið hefði verið við loforð frá 1995 um að láta lífeyrinn fylgja lágmarkslaunum eða launavísitölu. Þessir  1,3 milljarðar,sem ríkisstjórnin ætlar nú náðarsamlegast að láta í byggingar hjúkrunarheimila næstu 4 árin, er því alger hungurlús miðað við alla þá fjármuni,sem ríkisstjórnin hefur haft af öldruðum.

Blekkkingar fjölmiðla

Þsð er með ólíkindum, að fjölmiðlar og einkum Mbl. skuli taka þátt í blekkingarleik stjórn-

valda í málefnum aldraðra. Það er  búið að “svelta” framkvæmdir í þágu aldraðra allt það kjörtímabil, sem nú er senn á enda og í rauninni mikið lengur.Reykjavíkurborg gerði samkomulag við Jón Kristánsson þáverandi heilbrigðisráðherra  fyrir 4 árum um byggingu hjúkrunarheimilis fyrir aldraða í Reykjavík. Þáverandi fjármálaráðherra, Geir Haarde,felldi það samkomulag úr gildi. Og Sjálfstæðisflokkurinn kom í veg fyrir það í 4 ár,  að umrætt hjúkrunarheimili yrði byggt. Framkvæmdasjóður aldraðra var ekki notaður til framkvæmda eins og hann var stofnaður til. Stjórnvöld hafa tekið marga  milljarða úr honum til eyðslu.Ef þeir fjármunir hefðu verið notaður til byggingar hjúkrunarheimila eins og til stóð væri ástandið í vistunarmálum aldraðra annað og betra en það nú er. Stjórnvöld eru því nú aðeins að skila litlu til baka af því fjármagni,sem aldraðir eiga fullan rétt á  og áttu að fá fyrir löngu.

Lífeyrir óviðunandi

Hjúkrunar og vistunarmál aldraðra eru mikilvægt mál. En lífeyrismálin eru ekki síður mikilvæg og þar er algert vandræðaástand ríkjandi.Lífeyrir aldraðra dugar ekki til framfærslu. Eftir  “smánarsamkomulag” sumarsins er lífeyrir þeirra,sem eingöngu fá bætur almannatrygginga 123 þúsund  á mánuði fyrir skatta. Eftir skatta eru þetta aðeins  í kringum 106 þúsund. Og þetta er aðeins fyrir þá sem búa einir og hafa heimilisuppbót og fulla tekjutryggingu.Ef þessir einhleypingar fara í sambúð eða leigja íbúð með öðrum fellur heimilisuppbótin niður.Á sama tíma og ríkisstjórnin skammtar þessum ellilífeyrisþegum  106 þúsund á mánuði eru neysluútgjöld einstaklinga 201 þúsund krónur á mánuði án skatta. Það er því engin leið fyrir ellilífeyrisþega að lifa af þessum smánarbótum. Krafan er sú, að lífeyririnn verði hækkaður í 160-170 þúsund á mánuði. um áramót. Það er lágmark.

Björgvin Guðmundsson