Kastljós sjónvarpsins tók til meðferðar Baugsmálið í gærkveldi.Viðtal var við Sullenberger,sem kom málinu af stað og nokkuð ítarleg frásögn var af vissum þáttum málsins,einkum útgáfu umdeildra kreditreikninga.Gallinn við þessa umfjöllun var sá,að einungis sjónarmið annars aðilans kom fram,þar eð enginn var til andsvars frá Baugi.Fulltrúar Baugs neituðu að koma í þátt Kastljós,þar eð þeir töldu ekki unnt að fjalla um málið á fullnægjandi hátt í stuttum sjónvarpsþætti og málið væri til meðferðar fyrir dómstólum,sem ættu að útkljá það.Það er mikil spurning hvort réttlætanlegt er að ríkissjónvarpið taki svo viðkvæmt og mikilvægt mál til meðferðar,þegar fulltrúar sakborninga eru ekki til staðar til þess að svara fyrir sig.

  Hvers vegna ekki olíumálið?

Baugsmálið hefur verið mjög umdeilt og því hefur jafnvel verið haldið fram,að stjórnmál hafi blandast inn í málið.Því hefur verið haldið fram,að stjórnmálalegar ástæður hafi hleypt málinu af stað og að um ofsóknir gegn Baugi hafi verið að ræða. Það hafi átt að koma  fyrirtækinu á kné.Einmitt af þessum ástæðum verður ríkissjónvarpið að fara mjög varlega í umfjöllun um málið.Það verður einnig að gera þá kröfu til sjónvarpsins að  það hafi jafnræðisreglu í heiðri við ákvörðun um dómsmál,sem tekin eru til meðferðar.Mörg önnur viðkvæm dómsmál eru til meðferðar í kerfinu,sem  Kastljós sjónvarpsins  hefur ekki tekið til umfjöllunar á  sama hátt og Baugsmálið. Þar má fyrst nefna samráð olíufélaganna. Það mál er komið lengra í kerfinu en Baugsmálið og því eðlilegra að  fjalla um það. Það er búið að úrskurða að olíufélögin hafi gerst sek um ólögmætt verðsamráð,sem skaðað hefur neytendur um ómældar fjárhæðir. En það á eftir að  úrskurða hvort forstjórar olíufélaganna hafi gerst sekir um ólögmætt athæfi og hvaða refsinu þeir eigi að fá. Hvers vegna tekur Kastljós þetta mál ekki fyrir? Það leikur enginn vafi á sekt olíufélaganna. Þau eru sek um ólögmætt verðsamráð.Það á aðeins eftir að dæma um hlut forstjóranna í hinu ólögmæta athæfi. Þetta er mikið stærra mál en Baugsmálið. Almenningur hefur orðið fyrir miklum skaða af ólögmætu verðsamráði  olíufélaganna en sennilega hefur almenningur ekki orðið fyrir neinum skaða vegna Baugsmálsins.Ef einhver hefur orðið fyrir skaða í Baugsmálinu eru það hluthafarnir.Það verður að segjast eins og er,að forgangsröðun Kastljóss er skrítin.Hún lyktar af pólitík.Var kippt í spotta?

Björgvin Guðmundsson