Algert öngþveiti ríkir nú í heilbrigðismálum hér á  landi. Ríkisstjórnin  hefur gefið Landspítala Háskólasjúkrahúsi  fyrirmæli um að  skera eigi niður útgjöld spítalans um  1,5 milljarð króna.  Stjórnendur Landspítalans hafa ákveðið að segja upp 200 manns til þess að mæta kröfum ríkisstjórnarinnar.M.a. er rætt um að loka geðdeild að Arnarholti og einnig deild fyrir aldraða á Landakoti. Ríkisstjórnin er  búin að gleyma loforðum sínum um að  bæta aðstöðu aldraðra.

   EKKI FRAMKVÆMANLEGT

Þeir, sem best þekkja til starfsemi Landspítalans segja,að ekki sé framkvæmanlegt,að skera svo mikið niður sem ríkisstjórnin fer fram  á. Auk þess benda þeir á,að nefnd sé starfandi sem leggja eigi fram tillögur um stefnuna varðandi rekstur Landspítalans. Á nefndin að skila áliti næsta vor  og  telja menn því eðilegt að bíða með sparnaðaraðgerðir þar til álit nefndarinnar liggur fyrir. Ef uppsagnir og niðurskurður ná fram að ganga  munu gæði spítalans minnka mikið og óvíst,að unnt verði að sinna þeim sjúklingum sem þangað verða sendir. Hætt er við,að neyðarástand gæti skapast.

 DRAGA ÚR KENNSLU OG RANNSÓKNUM

Ef skera á svo mikið niður sem ríkisstjórnin fer fram á virðist eina leiðin sú,að  skera niður kennslu og rannsóknir við Landspítala. Má því skoða kröfur ríkisstjórnarinnar sem kröfu um að draga úr eða  fella niður rannsóknir og kennslu við Landspítala. Það mundi þýða,að senda yrði  íslenska stúdenta,sem vildu læra læknisfræði, til útlanda. Ljóst er,að ríkisstjórnin hefur ekki hugsað þetta mál til enda. Tillögur um stórfelldan sparnað á Landspítala,Háskólasjúkrahúsi,virðast settar fram í algeru fljótræði.Heilbrigðisráðherra virðist ekki hafa hugsað þessi mál nægilega vel áður en hann setti fram kröfuna um stórfelldan sparnað nema hann hafi tekið blindandi við kröfu fjármálaráðherra um niðurskurð.

 STARFSFÓLKIÐ MÓTMÆLIR

Starfsmannaráð Landspítalans hélt fund um mál þetta  15.janúar sl. og mótmælti harðlega niðurskurðaráformum. Sagði í ályktun ráðsins,að  umræddur niðurskurður  mundi stórskaða spítalann og  rýra gæði hans verulega.Afleiðingin yrði einnig  sú,að  meðferð sjúklinga mundi flytjast út fyrir veggi sjúkrahússins.

Björgvin Guðmundsson