Morgunblaðið hefur undanfarið rekið mjög harðan áróður fyrir því ,að Vinstri grænir og Sjálfstæðisflokkurinn tækju upp samstarf. Fyrst rak blaðið áróður fyrir því,að Vinstri grænir og íhaldið mynduðu meirihluta í borgarstjórn Reykjavíkur en síðan hóf blaðið áróður fyrir samstarfi þessara flokka um landsstjórnina. Morgunblaðið sér fram á það, að Framsókn dugi ekki lengur sem hækja fyrir íhaldið í ríkisstjórn og því þurfi að koma upp nýjum samstarfsaðila. Það varð því algert reiðarslag fyrir Morgunblaðið, þegar Steingrímur J.Sigfússson formaður VG varpaði fram þeirri tillögu í síðustu viku, að stjórnarandstaðan ætti að mynda ríkisstjórn og koma íhaldinu frá völdum.Þá varð ljóst, að áróður Morgunblaðsins hafði engan árangur borið.Morgunblaðið brást þannig við, að það réðist af alefli á Steingrím J. í Reykjavíkurbréfi í gær. Allt Reykjavíkurbréfið er helgað hörðum árásum á Steingrím J. og virðist blaðið gersamlega hafa misst stjórn á sér.Blaðið grípur m.a. til þess ráðs að halda því fram,að Steingrímur J. sé mikið til einn um þessa skoðun innan VG að vilja mynda það sem Mbl. kallar vinstri stjórn. Síðan kemur gamli söngur Mbl. um hvað vinstri stjórnin séu slæmar og að það væri algert óráð að mynda slíka stjórn.
Íhaldið verður að vera með!
Hvað er Morgunblaðið að segja í þessu Reykjavíkurbréfi. Jú blaðið er að segja,að Vinstri grænir og það gildir auðvitað um Samfylkinguna líka verði alltaf að mynda stjórn með Sjálfstæðisflokknum. Vinstri stjórnir gangi ekki. Sjálfstæðisflokkurinn verði alltaf að vera innan borðs. Morgunblaðið gengur svo langt í áróðri sínum, að blaðið segir,að ef Steingrímur J. berjist fyrir stjórn stjórnarandstöðunnar geti hann glutrað niður öllu fylgi VF og með baráttu fyrir slíkri stjórn sé hann í raun að berjast gegn vinstri flokkunum! Það er ekki heil brú í þessum málflutningi Mbl. En skrifin eru skiljanleg vegna þess, að Mbl. óttast það að íhaldið verði sett út í kuldann , ef Samfylking,VG og frjálslyndir myndi ríkisstjórn. Mbl. þykist ekki skilja það,að fylgisaukning VG stafar m.a. af harðri baráttu flokksins gegn Sjálfstæðisflokknum og ríkisstjórn hans.Það væru hrein svik við kjósendur, ef flokkarnir,sem barist hafa hatrammlega gegn Sjálfstæðisflokknum héldu þeim flokki áfram við völd eftir að stjórnin væri fallin.
Söngurinn um “vinstri stjórnir”
Sjálfstæðisflokkurinn og Mbl. ráku lengi þann áróður, að “vinstri menn “ gætu ekki komið sér saman um stjórn Reykjavíkurborgar og að þeir gætu ekki stjórnað fjármálum borgarinnar.Þetta var kallað glundroðakenningin.R-listinn afsannaði þessa kenningu rækilega. R-listinn sýndi, að vinstri flokkarnir gátu starfað vel saman og þeir stjórnuðu fjármálum borgarinnar betur en íhaldið. Nú notar Mbl. svipað kenningu í landsmálunum. Nú segir blaðið að “vinstri flokkar” geti ekki stjórnað landinu.Það verði alltaf verðbólga undir þeirra stjórn. Þetta er rugl. Í fyrsta lagi er ekki verið að tala um neina vinstri stjórn. Ef stjórnarandstaðan myndar ríkisstjórn er það engin vinstri stjórn, þar eð Frjálslyndi flokkurinn er enginn vinstri flokkur. Í öðru lagi gleymir Mbl. Því,að verðbólgan er komin á skrið nú undir stjórn íhaldsins. Í þriðja lagi hefur Sjálfstæðismönnum tekist bærilega að magna upp verðbólguna. Mesta verðbólgan var þegar ríkisstjórn Gunnars Thoroddsen var við völd. En það var verkalýðshreyfingin sem tók í tauman og stöðvaði verðbólguna með þjóðarsáttinni. Sjálfstæðisflokkurinn hafði ekkert með það að gera.
Að sjálfsögðu geta Samfylking,VG og Frjálslyndir stjórnað efnahagsmálum hér eins vel og jafnvel betur en núverandi ríkisstjórn. Og það sem þessir flokkar mundu gera fyrst og fremst er að leiðrétta misskiptinguna,ójöfnuðinn ,sem núverandi stjórnarflokkar hafa leitt yfir þjóðina.
Björgvin Guðmundsson
Birt í Fréttablaðinu 7.sept. 2007 |
