Fréttablaðið skýrir frá því 11.nóvember,að samkomulag hafi verið orðið milli borgarfulltrúa R-listans um,að Dagur B.Eggertsson yrði nýr borgarstjóri í stað Þórólfs Árnasonar.En þá hafi forusta Framsóknarflokksins lagst gegn því á þeim forsendum,að R-listinn ætti ekki að ala upp nýjan leiðtoga fyrir Samfylkinguna.Er þetta ekki í fyrsta sinn,sem forusta Framsóknar beitir bolabrögðum gegn R-listanum. Hún gerði það einnig þegar Ingibjörg SólrúnGísladóttir tilkynnti,að hún ætlaði að bjóða sig fram til varasætis á þinglista Samfylkingarinnar í Reykjavík. Þá krafðist forusta Framsóknar þess, að Ingibjörg Sólrún léti af borgarstjóraembættinu.Linnti forusta Framsóknar ekki látum fyrr en Ingibjörgu Sólrúnu hafði verið bolað úr embætti borgarstjóra en hún var reiðubúin til þess að gegna borgarstjóraembættinu út kjörtímabilið samhliða varaþingmennsku.Forusta Framsóknar átti síðan stóran þátt í því að fá Þórólf Árnason til starfa í stað Ingibjargar.
Alfreð Þorsteinsson hefur fengið orð fyrir það,að vera sjálfstæður og að láta flokksforustuna ekki beygja sig. T.d. stóð hann sig mjög vel í fjölmiðlamálinu og átti þátt í því að stöðva hið illræmda fjölmiðlafrumvarp. Kunni formaður Framsóknarflokksins honum litlar þakkir fyrir. Því veldur það undrun, ef hann hefur nú látið forustu Framsóknar beygja sig við val á nýjum borgarstjóra. Dagur B.Eggertsson skýrir frá því í viðtali við Fréttablaðið,að Alfreð Þorsteinsson hafi komið að máli við sig og spurt hann hvort hann vildi taka við embætti borgarstjóra.Kvaðst Dagur hafa verið upp með sér vegna þessa.Allir borgarfulltrúar voru reiðubúnir að samþykkja Dag en þá kippti flokksforusta Framsóknar í taumana. Anna Kristinsdóttir gugnaði strax. Því verður ekki trúað,að Alfreð hafi einnig gugnað en þó kann svo vel að vera.
Nokkrir brestir hafa komið í samstarf R-listans við þau átök,sem urðu við val á nýjum borgarstjóra. Framtíðin mun leiða í ljós hvort það tekst að bæta þá bresti fyrir næstu kosningar til borgarstjórnar.En það er óþolandi,að forusta Framsóknar skuli ítekað blanda sér í málefni R-listans og beita bolabrögðum. Það styrkir ekki listann.
Sú yfirlýsing Vinstri grænna,að þeir gætu ekki lengur treyst Þórólfi Árnasyni sem borgarstjóra hefur einnig veikt samstarfið.Segja má,að þar með hafi þeir sett hinum flokkunum stólinn fyrir dyrnar.Hið sama má segja um afstöðu Framsóknar til Dags B.Eggertssonar sem borgarstjóra.Eftir afskipti flokksforustu Framsóknar neituðu fulltrúar Framsóknar að styðja Dag B. Eggertsson þrátt fyrir samstöðu áður.Framsókn vildi heldur ekki styðja Stefán Jón Hafstein sem borgarstjóra.
Steinunn Valdís,væntanlegur borgarstóri, hefur reynst duglegur borgarfulltrúi og er öllum knútum kunnug á sviði borgarmála eftir 10 ára starf í borgarstjórn. Hún er skelegg og gæti reynst vel sem borgarstjóri.Þegar hún hefur öðlast vissan borgarstjórasvip og örlítið meiri hógværð en hún hefur haft til þessa gæti hún orðið ágæt.
Björgvin Guðmundsson
Birt í Fréttablaðinu 29.nóv. 2004
